ക്ലാസിക് ക്രൈം ത്രില്ലറുകളെ അനുസ്മരിപ്പിക്കുന്ന ടോവിനോ തോമസിന്റെ ‘അന്വേഷിപ്പിൻ കണ്ടെത്തും’ ടീസർ
Tovino Thomas movie Anweshippin Kandethum Teaser
Tovino Thomas movie Anweshippin Kandethum Teaser: ഏറെ പ്രതീക്ഷയോടെ കാത്തിരിക്കുന്ന ടോവിനോ തോമസിന്റെ ‘അന്വേഷിപ്പിൻ കണ്ടെത്തും’ എന്ന ചിത്രത്തിന്റെ ടീസർ അണിയറ പ്രവർത്തകർ പുറത്തുവിട്ടു. ഡാർവിൻ കുര്യാക്കോസ് സംവിധാനം ചെയ്യുന്ന ഇൻവെസ്റ്റിഗേറ്റീവ് ത്രില്ലറിന്‍റെ ടീസർ ഒരു സ്ത്രീ മരിച്ച് കിടക്കുന്നിടത്താണ് ആരംഭിക്കുന്നത്.
തുടർന്ന്, ടോവിനോ തോമസിന്റെ പോലീസ് കഥാപാത്രം നടത്തുന്ന അന്വേഷണങ്ങളുടെ മിക്സഡ് ഷോട്ടുകൾ ടീസർ ഉൾക്കൊള്ളുന്നു. എസ്ഐ ആനന്ദ് എന്ന കഥാപാത്രത്തെയാണ് ചിത്രത്തിൽ ടോവിനോ തോമസ് അവതരിപ്പിക്കുന്നത്. ഒറ്റനോട്ടത്തിൽ, ടീസർ ക്ലാസിക് ക്രൈം ത്രില്ലറുകളെ അനുസ്മരിപ്പിക്കുന്നതാണ്. യഥാർത്ഥത്തിൽ കേരളത്തെ ഞെട്ടിച്ച ഒരു കൊലപാതകമാണ് സിനിമയുടെ പശ്ചാത്തലം.
1980-കളുടെ അവസാനത്തിലാണ് ഈ കഥ നടക്കുന്നത്. നാല് പോലീസുകാരെ ചുറ്റിപ്പറ്റിയുള്ള ‘അന്വേഷിപ്പിൻ കണ്ടെത്തും’, ഈയൊരു വീക്ഷണത്തിൽ മമ്മൂട്ടിയുടെ കണ്ണൂർ സ്ക്വാഡിനെ ഓർമ്മിപ്പിക്കുന്നു. ജിനു വി എബ്രഹാം ആണ് ഈ ചിത്രത്തിന്റെ രചന നിർവഹിച്ചിരിക്കുന്നത്. ടോവിനോ തോമസിനൊപ്പം, സിദ്ദീഖ്, ഇന്ദ്രൻസ്, ഷമ്മി തിലകൻ, അലൻസിയർ ലോപസ് എന്നിവർ കേന്ദ്ര കഥാപാത്രങ്ങളിൽ എത്തുന്നു.
ഫെബ്രുവരി 9-ന് തിയേറ്ററുകളിൽ എത്താൻ തയ്യാറെടുക്കുന്ന ‘അന്വേഷിപ്പിൻ കണ്ടെത്തും’, യൂഡ്ലീ ഫിലിംസ് ആണ് നിർമ്മിച്ചിരിക്കുന്നത്. കേന്ദ്ര കഥാപാത്രങ്ങൾക്ക് ഒപ്പം, ഹരിശ്രീ അശോകൻ, പ്രേം പ്രകാശ്, കോട്ടയം നസീർ, മധുപാൽ, പ്രമോദ് വെളിയനാട്, അസീസ് നെടുമങ്ങാട് തുടങ്ങിയവരും ചിത്രത്തിൽ ശ്രദ്ധേയമായ കഥാപാത്രങ്ങൾ അവതരിപ്പിക്കുന്നു. ‘കൽക്കി’ക്ക്‌ ശേഷം ടോവിനോ തോമസ് പോലീസ് വേഷത്തിൽ എത്തുന്ന ചിത്രമാണ് ‘അന്വേഷിപ്പിൻ കണ്ടെത്തും’.