Kanguva movie review: രണ്ട് വർഷങ്ങൾക്ക് ശേഷം സൂര്യ നായകനായ ഒരു ചിത്രം തീയേറ്ററുകളിൽ എത്തിയതിനാൽ, വലിയ സ്വീകാര്യതയാണ് സൂര്യ ആരാധകരിൽ നിന്ന് ‘കങ്കുവ’ക്ക്‌ ലഭിക്കുന്നത്. 2D, 3D ഫോർമാറ്റുകളിൽ പ്രദർശനത്തിനെത്തിയ ചിത്രത്തിന്റെ ആദ്യ ഷോകൾ അവസാനിക്കുമ്പോൾ, കേരള പ്രേക്ഷകരിൽ നിന്നും മികച്ച അഭിപ്രായം ആണ് ഈ തമിഴ് ചിത്രത്തിന് ലഭിക്കുന്നത്.
ശിവ സംവിധാനം ചെയ്ത ചിത്രത്തിൽ, ബോബി ഡിയോൾ, ദിശ പട്ടാണി തുടങ്ങിയ സൂപ്പർ താരങ്ങളും വേഷമിട്ടിരിക്കുന്നു. ചിത്രത്തിൽ ഡബിൾ റോളിൽ ആണ് സൂര്യ എത്തിയിരിക്കുന്നത്. ഒരു ആക്ഷൻ ഫാന്റസി ഡ്രാമ ചിത്രമാണ് ‘കങ്കുവ’. ചിത്രത്തിലെ ആക്ഷൻ രംഗങ്ങൾക്ക്‌ പ്രേക്ഷകരിൽ നിന്ന് വലിയ കൈയ്യടി ലഭിക്കുന്നു. സൂപ്പർ അൺ ബിലിവബിൾ വിഷ്വൽസ് ആണ് പ്രേക്ഷകർക്കായി ‘കങ്കുവ’ കരുതിവെച്ചിരിക്കുന്നത്. വെട്രി പളനിസ്വാമി ഛായാഗ്രഹണം നിർവഹിച്ച ചിത്രത്തിന്റെ എഡിറ്റിംഗ്
കൈകാര്യം ചെയ്തിരിക്കുന്നത് നിഷാദ് യൂസഫ് ആണ്. അഭിനേതാക്കളുടെ പ്രകടനം നോക്കിയാൽ, സൂര്യയുടെ പ്രകടനം മികച്ച് നിൽക്കുന്നതായി പ്രേക്ഷകർ ഒന്നടങ്കം അഭിപ്രായപ്പെടുന്നു. 3D എക്സ്പീരിയൻസ് പ്രേക്ഷകനെ ശരിക്കും എന്റർടെയിൻ ചെയ്യിപ്പിക്കുന്ന വിധത്തിലാണ് ‘കങ്കുവ’ ഒരുക്കിയിരിക്കുന്നത്. അതേസമയം സ്ക്രിപ്റ്റിൽ ഉള്ള പോരായ്മ കല്ലുകടിയായെന്ന് പ്രേക്ഷകരുടെ അഭിപ്രായത്തിൽ പ്രകടമാകുന്നു. എന്നിരുന്നാലും, നായകനായുള്ള സൂര്യയുടെ രണ്ടു വർഷത്തിനു ശേഷമുള്ള തിരിച്ചുവരവ്
ആഘോഷിക്കാൻ തന്നെയാണ് സൂര്യ ആരാധകർ തീരുമാനിച്ചിരിക്കുന്നത് എന്ന് ഫസ്റ്റ് ഷോകളിലെ തിരക്ക് പ്രകടമാക്കുന്നു. സ്റ്റുഡിയോ ഗ്രീൻ, യുവി ക്രിയേഷൻസ് എന്നിവയുടെ ബാനറിൽ കെഇ ഗ്നനാവേൽ രാജ, വംശി കൃഷ്ണ റെഡ്ഡി, പ്രമോദ് എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. ആദ്യ ഷോകൾക്ക് ശേഷം മികച്ച അഭിപ്രായം ലഭിക്കുന്ന ‘കങ്കുവ’, വരും ദിവസങ്ങളിൽ കൂടുതൽ പ്രേക്ഷകരിലേക്ക് എത്തുമെന്ന് തന്നെ പ്രതീക്ഷിക്കാം. രണ്ടര മണിക്കൂർ ദൈർഘ്യം ഉള്ള ഒരു വിഷ്വൽ വിരുന്ന് ആസ്വദിക്കാൻ ഇഷ്ടമുള്ളവർക്ക്, ‘കങ്കുവ’ ഒരു സൂപ്പർ ചോയ്സ് തന്നെ.