ദക്ഷിണാഫ്രിക്കക്കെതിരായ അവസാന ടി20 മത്സരത്തിൽ സെഞ്ചുറി പ്രകടനവുമായി ഇന്ത്യൻ താരം സഞ്ജു സാംസൺ തിളങ്ങിയതോടെ, മലയാളി ക്രിക്കറ്റ് ആരാധകർ എല്ലാവരും തന്നെ വലിയ സന്തോഷത്തിലാണ്. 4 മത്സരങ്ങൾ അടങ്ങിയ പരമ്പരയിലെ ആദ്യ മത്സരത്തിൽ സഞ്ജു സെഞ്ചുറി നേടിയിരുന്നു. ഒക്ടോബർ മാസത്തിൽ നടന്ന ബംഗ്ലാദേശിനെതിരായ
ടി20 പരമ്പരയിലെ അവസാന മത്സരത്തിൽ സെഞ്ച്വറി നേടിയ സഞ്ജു, ദക്ഷിണാഫ്രിക്കെതിരായ ആദ്യ മത്സരത്തിൽ സെഞ്ച്വറി നേടിയതോടെ തുടർച്ചയായി രണ്ട് ടി20 അന്താരാഷ്ട്ര മത്സരങ്ങളിൽ സെഞ്ചുറി നേടുന്ന ആദ്യ ഇന്ത്യൻ താരമായി മാറിയിരുന്നു. ഇതിന് പിന്നാലെ താരത്തിന് ക്രിക്കറ്റ് ലോകത്തിന്റെ നാനാഭാഗത്തുനിന്നും വലിയ പ്രശംസ ലഭിച്ചു. എന്നാൽ, ദക്ഷിണാഫ്രിക്കക്കെതിരായ രണ്ടാമത്തെയും മൂന്നാമത്തെയും ടി20 മത്സരങ്ങളിൽ സഞ്ജു സാംസൺ റൺ ഒന്നും തന്നെ എടുക്കാൻ സാധിച്ചില്ല. രണ്ട് മത്സരങ്ങളിലും ഓപ്പണർ ആയ
സഞ്ജു പൂജ്യത്തിന് പുറത്തായതോടെ, അദ്ദേഹത്തിന് സ്ഥിരതയില്ല എന്ന തരത്തിൽ വീണ്ടും വിമർശകർ കമന്റുകൾ പാസ് ചെയ്തുകൊണ്ടിരുന്നു. എന്നാൽ, വിമർശകരുടെ വായ അടപ്പിക്കുന്ന പ്രകടനമാണ് കഴിഞ്ഞ ദിവസം സഞ്ജു പുറത്തെടുത്തത്. 56 പന്തിൽ 6 ഫോറും 9 സിക്സും സഹിതം 109* റൺസുമായി സഞ്ജു പുറത്താകാതെ ക്രീസിൽ തുടർന്നു. ഇതോടെ സഞ്ജു സാംസന്റെ ആരാധകർ തങ്ങളുടെ ഇഷ്ടകാലത്തെ വിമർശിച്ചവർക്ക് എതിരെ പ്രതികരിക്കാൻ ആരംഭിച്ചു. ഇതിൽ പ്രധാനിയാണ് വടകര എംപി ഷാഫി പറമ്പിൽ.
സഞ്ജു സാംസന്റെ ആരാധകൻ ആയ ഷാഫി, “താഴെ വീണ കണ്ട് പല്ലിളിച്ച കൂട്ടരേ,” എന്ന തലക്കെട്ടോടുകൂടി സഞ്ജു സാംസന്റെ ചിത്രം പങ്കുവെച്ചു. അദ്ദേഹത്തിന്റെ മോശം അവസ്ഥയിൽ പരിഹസിച്ചവർക്കുള്ള മറുപടിയാണ് ഷാഫി പറമ്പിൽ എംപി നൽകിയിരിക്കുന്നത്. നേരത്തെ സഞ്ജു ദക്ഷിണാഫ്രിക്കക്കെതിരെ ഒന്നാം ടി20 മത്സരത്തിൽ സെഞ്ചുറി നേടിയപ്പോഴും ഷാഫി തന്റെ സന്തോഷം പങ്കുവെച്ചിരുന്നു.
“തലൈവർ എന്നാ സുമ്മാവാ. സന്തോഷവും അഭിമാനവും എങ്ങനെയാ പറയാന്ന് അറിഞ്ഞൂടാ,” ഷാഫി പറമ്പിൽ തന്റെ സോഷ്യൽ മീഡിയ ഹാൻഡിൽ കുറിച്ചു. സമാനമായി നിരവധി പ്രമുഖരും സാധാരണക്കാരും ആയ സഞ്ജു സാംസൺ ആരാധകർ സാമൂഹ്യ മാധ്യമങ്ങളിലും മറ്റും തങ്ങളുടെ സന്തോഷം പ്രകടിപ്പിക്കുന്നത് തുടർന്നുകൊണ്ടിരിക്കുകയാണ്. Shafi Parambil MP reaction to Sanju Samson century against SA